tg-me.com/lukmanbdran1970/4250
Last Update:
بأسعَد ليله
هَمنه انزِيله
ليله امنِ العمر . أجمَل بَدر . غَطانه ضَيه
**
ياگلب إعلِن هوَاك وخَل تِطيب ايامك
خل تِطيب ايامك
لا حزن بَـعد اليمرَّك والأمل گدّامك
والأمل گدّامك
إفرَح السِبط الرساله ولُوم كِلمن لامَك
لُوم كِلمن لامَك
عُوف ياگلبي الحزن والدهَـر إنسَه آلامَـه
جِيب وَردات النِده وإنثرها تَحت اجدامه
هذا المُجتبى . ريح الصِبَا . وي جَيته هيه
ليله امن العمر .أجمَل بَدر . غَطانه ضَيه
**
نوِّرَت أرض المدينه ابشَهر رحمه ورَأفه
شَهر رحمه ورَأفه
ودَاعِبت وجه السَنابل ريح حِلوه وتَرفه
ريح حِلوه وتَرفه
وصِعد عصفور البَوادي الغِصنه وأعلَن عَزفه
الغِصنه وأعلَن عَزفه
شَـال بجناحـَـه الورد والعَـنبر وأطيـَـابه
ويوم ميلاد الحسَن طَشها ابفَرح لاحبَابه
غرَّد وابتِشر . طَش الخبر . فوگ الوِطيه
ليله امنِ العمر . أجمَل بَدر . غَطانه ضَيه
**
فرحَت اطفال المَدينه وعَلّـگتها الزينه
عَلگتها الزينه
ورَدِّدَت باعذَب لَحن ماجِينه ياماجينه
ماجِينه ياماجينه
يابَشير المَـر باهَلنه ابحِـنتَـك حَنـِّينه
ابحِـنتَـك حَنـِّينه
نـور وبأكـرَم شَـهر هَـل بجمَـاله اعلـينه
ودُوم بهلال الحَسن نشكر فَضل بَارينه
بَدْر ومِعتلي . ابن الوَلي . وزهره الزچيه
ليله امنِ العمر . أجمَل بَدر . غَطانه ضَيه
**
هذا گـرَّة عين أُمه الجَـدَّه لمّن شافه
جَدَّه لمّن شافه
كبَّر بإذنَه الشريفه وقـبَّله امن اشفافه
قـبَّله امن اشفافه
الحسَن گلهُم إسمه لنّه مامِثل أوصَافه
مامِثل أوصَافه
رَاح عَـق عَنـَّـه وكِـرَم كِلمَـن فِـرَح بقـدُومه
جَاب فطرِس حِنِّته وجبريل جاب اهدُومه
هذا ابن الحسَب . وابن النسَب . بالهاشميه
ليله امنِ العمر . أجمَل بَدر . غَطانه ضَيه
.....…....
لقمان البدران
https://www.tg-me.com/no/الشاعر لقمان البدران/com.lukmanbdran1970
BY الشاعر لقمان بدران
Share with your friend now:
tg-me.com/lukmanbdran1970/4250